Tuesday, July 07, 2015

သူ online ရှိသည်ဖြစ်စေ မရှိသည် ဖြစ်စေ။

ကိုယ်ချစ်မြတ်နိုးရသူက တစ်ပါးသူကမ်းတဲ့လက်ကိုမှ ဆုတ်ကိုင်လိုက်တဲ့အခါ
ကမ္ဘာမြေကြီး ၉၀' တိမ်းစောင်းသွားတယ်ဆိုတာသိလား
မိုးကောင်းကင်က ကိုယ်နဲ့အတူ ချုံးပွဲချငိုတယ်ဆိုတာသိလား
အရောင်စုံတဲ့လောကကြီးက အားလုံးမဲနက်သွားတယ်ဆိုတာသိလား
ကြေကွဲမှုတွေနဲ့ ကမ္ဘာမြေ တိတ်ဆိပ်သွားတာ သိလား
သိချင်သိ မသိချင်နေပါ။
အချစ်နဲ့ပါတ်သတ်ရင်တော့ စိတ်ထဲမှာ ထရော်မာ တွေတုန်ခါနေဆဲပဲ။
အချစ်ရင်ခုန်သံဆိုတာ အများတကာလို မသာယာခဲ့ဘူး ဆိုပါတော့။
စိတ်ထဲက နုတ်ဆက်ပါတယ်။ စိတ်ထဲက စကားတွေ လှမ်းပြောပါမယ်။
သူ online ရှိသည်ဖြစ်စေ မရှိသည် ဖြစ်စေ။


Saturday, July 04, 2015

သူလည်း ကိုယ့်လို ခံစားချက် ရှိရင်တော့ ကောင်းတာပေါ့

December 28, 2012 တုန်းကရေးခဲ့ဖူးတဲ့ အဟောင်းလေးပါ

--------------------------------------

သတိရတာလည်း ရတာပေါ့။

ငါ့စိတ်ထဲမှာတော့ခံစားရတာပါပဲ

ဟိုးအရင်တုန်းကလိုတော့ ရူသွပ်မှုမရှိပါဘူး

သံဝေဂလည်း အများကြီးရခဲ့ ပြီးပြီမို့ပါ

သူလည်း ကိုယ့်လို ခံစားချက် ရှိရင်တော့ ကောင်းတာပေါ့

တဖက်သတ် ခံစားချက်ဖြစ်လည်း

ကျင့်သားရနေပြီမို့ ဝမ်းတော့ မနည်းပါဘူး

မျဉ်းပြိုင်လိုဖြစ်နေတဲ့ ဘဝတွေ မပေါင်းဆုံနိုင်ဘူးလေ

အချစ်ဆိုတဲ့အရာက အိပ်မက်တခုလား

သိလားတော့ မသိဘူး

ကံကြမ္မာက ငြင်းပယ်ခြင်းတွေ ဆောင်ယူလာတတ်တယ်

ဘဝမှာတော့ နေတတ်ပါတယ်။

သတိရတာလည်း ရတာပေါ့။

ဒီလိုပဲ နိစ္စဓူဝ ကိစ္စတွေနဲ့ အချိန်တွေ စီးဆင်းသွားကြတာပဲ


Saturday, June 20, 2015

something in my heart...

ငါ့စိတ်တွေ တစ်စဆီ ပြန့်ကျဲနေတယ်။ ပြန်လိုက်ကောက်ပြီး သိမ်းဆည်းဖြစ်တော့မယ် မထင်ပါဘူး။ ရင်ထဲကအရမ်းချစ်မိတဲ့ မိန်းကလေးကိုတော့ စိတ်ထဲကနေ အရမ်းချစ်တာပဲလို့ ခဏခဏ ပြောဖြစ်တယ်။ သူ့ဟာသူ ကြားချင်ကြား မကြားချင်နေပေါ့လေ။ တကယ်တော့ တဖက်သတ်ချစ်ခြင်းဟာ ကျန်းမာရေးကို ထိခိုက်စေပါတယ်။ အရင်လိုပဲ ကံကြမ္မာကတော့ ငါ့ဘဝကို ပစ်မှတ်ထားတိုက်ခိုက်နေတုန်းပဲ။ သိသိသာသာပေါ့လေ။ ပြောမယ့်သာပြောရတာ ငါကလည်းငါပါပဲ။ ခုထိကတော့ ဘဝရဲ့ အဖြေကိုလည်း အရာရာတိုင်းမှာ လိုက်ရှာနေတုန်းပဲ။ လူသားမျိုးနွယ်စုရဲ့ အမှောင်ဘက်ခြမ်းကို အလင်းပေးဖို့လည်း မစွမ်းခဲ့ပါဘူး။ နောက်ဆုံးတော့ ဘဝဆိုတာ တော်လှန်ရေးပဲ မဟုတ်လား။ အနက်ရောင် ခါးသက်ခြင်းတွေ တစ်ကိုယ်လုံး ပျံ့နှံ့လာပြန်ပြီလား။ ဘဝဆိုတာ ဘဝဆိုတာ ဘဝဆိုတာ...


Tuesday, May 12, 2015

Interstellar

Interstellar ရုပ်ရှင် ကိုနာမည်ကြီးလို့ အထင်ကြီးနေတာ တကယ်ကြည့်လိုက်တော့ physics သဘောအရ အမှားတွေ အများကြီးပဲ။ black hole ရဲ့ gravity ကနေ လွတ်အောင် အင်ဂျင်တွေ အကုန်မောင်းပြီးထွက်တယ် လောင်စာကုန်သွားတဲ့အခါ အရှိန်နဲ့ ဆက်သွားတဲ့အခါကျ ပေါ့အောင်ဆိုပြီး lander module တွေကို ဖြုတ်လိုက်သတဲ့။ ဖြုတ်လိုက်တာနဲ့ ပင်မယာဉ်ကြီးက ဆက်သွားနေပြီး module တွေက black hole ထဲကို ကျသွားရောတဲ့။ ဒြပ်ဆွဲအား ကလည်း ဟိုဟာကြ သိပ်မဆွဲဘူး ဒီဟာကြ ပိုဆွဲလိုက်မယ်ဆိုပြီး ခွဲခြားဆက်ဆံသလား မသိတော့ဘူး။ တကယ်ဆို ပေါ့အောင်လည်း module တွေ ဖြုတ်ချစရာမလိုဘူး။ လောင်စာကုန်လို့ အင်ဂျင်တွေ ရပ်သွားကတည်းက နောက်ဆုံး အရှိန်နဲ့ တသတ်မှတ် ဆက်သွားရမယ့် အစား ဒြပ်ဆွဲအားက နောက်မှာ ရှိတော့ တဖြည်းဖြည်းနဲ့ အရှိန်နှေးသွား (decelerate) မယ်။ weight က ဘယ်လောက်ဖြစ်ဖြစ် အမြန်နှုံး အတူတူပဲ။ ဒါက ပထမတစ်ခုပါ။ နောက်ပြီးတော့ black hole ကျသွားတေ့လည်း လောင်ကျွမ်းသွားတာတွေ ဆွဲအားတအားပြင်းလွန်းလို့ ဆွဲဆန့်သွားတာမျိုးတွေ ဘာမှမဖြစ်ဘူး။ အေးဆေးပဲ။ အနာဂါတ်က လူတွေပဲ တည်ဆောက်ထားတယ်ဆိုတဲ့ tesseract ထဲရောက်သွားတယ်။ အဲဒီမှာ စဉ်းစားကြည့်လေ။ အာကာသကို သူသွားဖို့ အကြောင်းဖန်လာအောင် အာကာသထဲရောက်လာမှ အတိပ်ကို ပြန်ပြီး message ပို့တယ်ဆိုတော့... ပတ်ချာလည်နေပြီ။ tesseract ကြီးကို ဆောက်ထားတာလည်း ဒီ့ထက် အနာဂါတ်ကျတဲ့ အချိန်ကလူတွေက အခုလို ဖြစ်လာအောင် အချက်အလက်တွေပို့နိုင်ဖို့ ဆိုတော့ ...... လုံးဝကို မဖြစ်နိုင်ခြင်း loop ပတ်နေတယ်။ နောက် forum တွေမှာ လိုက်ဖတ်ကြည့်တော့ သူတို့ရေးထားတာတွေ အရဆိုရင် အချိန်ကုန် အရမ်းမြန်နေတဲ့ ဂြိုဟ်ဆိုရင် အဲ့လောက်မြန်တယ် ဆိုကတည်းက gravitational field အရမ်းပြင်းတဲ့နေရာရောက်နေလို့ပဲ။ အဲဒီဂြိုဟ်လည်း တစ်စဆီကြေမွနေလောက်ပြီတဲ့။ နောက်လည်း အများကြီးပဲ။ ဘာပဲဖြစ်ဖြစ် ကြည့်လို့တော့ ကောင်းပါတယ်။ မကြည့်ရသေးရင်တော့ ကြည့်လိုက်ကြပါအုံး


General Aung San said...




Monday, December 08, 2014

Edge of Tomorrow


ဇာတ်လမ်းကတော့ ထင်ထားတာမျိုးမဟုတ်ပဲ ထူးဆန်းတယ်။ ဂြိုဟ်သားတွေကို တိုက်ခိုက်တဲ့အကြောင်း ကားတွေ အများကြီးပေမယ့် ဒီကားက ထင်မထားတဲ့ ဇာတ်လမ်းမျိုးပဲ။ စစ်မတိုက်ရဲတဲ့ Tom Cruise ကို စစ်ထဲ အတင်းပို့တယ်၊ လျှောက်ရမ်းပစ်ရင်း ဂြိုဟ်သားထဲက alphaလို့ သူတို့ အမည်ပေးထားတဲ့ အကောင်ကို ဗုံးနဲ့ခွဲပြီးသတ်လိုက်တာ ဟိုအကောင်ရဲ့ သွေးသားတွေ သူ့ခန္ဓာကိုယ်ထဲဝင်ပြီး သူလည်းသေရော။ ဒါပေမယ့် အဲ့အကောင်ရဲ့ဓါတ်ကြောင့် အချိန်တစ်ရက်တိတိ အရှေ့ ပြန်ရောက်သွားတယ်။ နောက်တစ်ခါအောင်မြင်အောင် ကြိုးစားတယ်။ သေတယ်။ အသစ်ပြန်စတယ်။ ကျနော်တို့ ဂိမ်းကစားသလိုပဲ။

ဂြိုဟ်သားတွေက တခြားကားတွေမှာလို အာကာသယာဉ်ကြီးတွေမပါဘူး။ သူတို့ကိုယ်တိုင် မြေလျှိုးမိုးပျံနိုင်တယ်၊ အချိန်ကိုလည်း နောက်ပြန်ဆုတ်နိုင်တယ်။ ဂြိုဟ်သား အကောင်တွေက Matrixရုပ်ရှင်ထဲက sentinal အကောင်တွေနဲ့ တူတယ်။ ဒီအကောင်တွေကတော့ ပိုအရုပ်ဆိုးတယ်။ တွန့်လိမ် ရှုတ်ပွနေတာပဲ။ :) ဒီလိုကားတွေမှာ တူတာ တစ်ခုက ဂေါင်သူကြီးကို ရှင်းလိုက်ရင် အကုန်ကြွရောဆိုတာပဲ။ နောက်သူတို့ လေယာဉ်တွေနဲ့ ဗုံးကြဲရင်ရရဲ့သားနဲ့ လူတွေကိုယ်တိုင် မြေပြင်ဆင်းတိုက်နေရတယ်။
ဘယ်လိုပဲဖြစ်ဖြစ် စိတ်ဝင်စားစရာကောင်း- ကြည့်လို့ကောင်းတဲ့ ရုပ်ရှင်လို့ပြောချင်ပါတယ်။



Saturday, December 06, 2014

Sooooo True :)



it found it at https://www.facebook.com/384733011680426/photos/a.384935904993470.1073741828.384733011680426/403108336509560/?type=1

Saturday, November 22, 2014

science and technology news

(ဟိုက်ဒရိုဂျင်လောင်စာသုံးကားကို ၂၀၁၆တွင် ရောင်းချမည်)
Toyotaက ဟိုက်ဒရိုဂျင်လောင်စာသုံး မောင်းနှင်မယ့် ကားကို ၂၀၁၆ ခုနှစ်မှာ စတင်ရောင်းချတော့မှာ ဖြစ်ပါတယ်။ ဒီကားကို Mirai လို့အမည်ပေးထားပါတယ်။ တစ်ကြိမ်လောင်စာဖြည့်ထားရင် မိုင်၃၀၀ မောင်းနိုင်ပြီး လောင်စာတစ်ကြိမ်ဖြည့်ဖို့ ၅မိနစ်သာကြာပါတယ်။ ဟိုက်ဒရိုဂျင်လောင်စာသုံး စွမ်းအင်ဟာ လေထုညစ်ညမ်းမှုမရှိစေပဲ ရေခိုးရေငွေ့ကိုသာ ထုတ်လွှတ်ပါတယ်။ အမေရိကန်ပြည်ထောင်စုနဲ့ အင်္ဂလန် နိုင်ငံမှာ ဟိုက်ဒရိုဂျင် အားဖြည့်စက်တွေ အများအပြားစတင်တည်ဆောက်နေပြီဖြစ်ပါတယ်။ ကားဈေးနှုန်းအနေနဲ့ကတော့ ဒေါ်လာ ၆၉၀၀၀ သတ်မှတ်ထားပါတယ်။

----------------------------

(Skypeကိုinstall မလုပ်ပဲသုံးနိုင်မည်)
Microsoftက Skypeကို web based အဖြစ် မကြာမီ စတင် အသုံးပြုနိုင်တော့မယ်လို့ ကြေငြာပါတယ်။ ဗွီဒီယို နဲ့စကားပြောနိုင်ဖို့ အတွက်ကတော့ browser plugin ထည့်ပေးဖို့ လိုပါတယ်။ စီးပွားရေးနဲ့ အဖွဲ့အစည်းတွေ အတွင်း အသုံးပြဖို့ ထုတ်လုပ်ထားတဲ့ Lyncကိုလည်း Skypeနဲ့ အစားထိုးသွားမှာ ဖြစ်ပါတယ်။ ပြီးခဲ့တဲ့ ဧပြီလကလည်း msn messenger (Live messenger) ကို Skypeနဲ့ပဲ အစားထိုးခဲ့ပါတယ်။ Microsoft ဟာ Skype ကိုဒေါ်လာသန်း၈၅၀၀ နဲ့ ၂၀၁၁ ခုနှစ်က ဝယ်ယူခဲ့တာ ဖြစ်ပါတယ်။

----------------------------

(ကြယ်တံခွန်ပေါ်ဆင်းသက်သည့် အာကာသယာဉ်)
ဥရောပအာကာသအဖွဲ့အစည်း ESAက လွနိခဲ့တဲ့ ၁၀နှစ်က လွှတ်တင်ထားတဲ့ Rosetta အာကာသယာဉ်ဟာ ကမ္ဘာမြေကနေ မိုင်သန်းပေါင်း ၃၁၀ အကွာအဝေးက ကြယ်တံခွန်67P အနီးကို ဩဂုတ်လထဲက ရောက်ရှိခဲ့ပါတယ်။ နိုဝင်ဘာ ၁၂ရက်မှာတော့ Philae ယာဉ်ငယ်လေးဟာ ပင်မRosetta ယာဉ်ကနေခွဲခွာပြီး ကြယ်တံခွန်ပေါ် ဆင်းသက်နိုင်ခဲ့ပါတယ်။ Philae မှာတပ်ဆင်ထားတဲ့ မြေပြင်မှာ ကုတ်တွယ်မယ့် ဆူးချိတ်တွေ အလုပ်မလုပ်လို့ အစပိုင်းမှာ မတည်ငြိမ်ပေမယ့် အခုတော့ တည်တည်ငြိမ်ငြိမ် ရှိကြောင်း သိရပါတယ်။ ကြယ်တံခွန်67P ဟာ အချင်းမိုင်၂.၅ခန့် ကြီးပါတယ်။ Philae မှာတပ်ဆင်ထားတဲ့ ကင်မရာက ကြယ်တံခွန် ရဲ့ပုံတွေကို ပို့ပေးနိုင်ခဲ့ပြီး တပ်ဆင်ထားတဲ့ကိရိယာတွေက သုတေသန ၉ မျိုးပြုလုပ်မှာ ဖြစ်ပါတယ်။

-----------------------------

(နိုဘယ်လ်ဆုရသုတေသန တွက်ချက်မှုမှားခဲ့သလား)
ဥရောပရဲ့ အမှုံသုတေသန အဖွဲ့အစည်း CERN ဟာ မနှစ်က Higgs Bosonအမှုံ ကို ရှာဖွေတွေ့ရှိခဲ့တာ မဟုတ်ပဲ Higgs Boson တုန့်ပြန်ပြုမူပုံဆင်တူတဲ့ အမှုံကို တွေ့ခဲ့တာ ဖြစ်နိုင်တယ်လို့ Southern Denmarkတက္ကသိုလ် ကရူပဗေဒပညာရှင်တွေက သုံးသပ်တွက်သပ်တွက်ချက်ပြီး Physical Review ဂျာနယ်မှာ ရေးသားခဲ့ပါတယ်။ standard model ကခန့်မှန်းတဲ့ စက်ြာဝဠာ ရဲ့ အား (၄)မျိုး အနက် ဒြပ်ဆွဲအားကို ပြည့်စုံအောင် သက်သေပြနိုင်ဖို့ Higgs Boson ရဲ့ ဖြစ်တည်မှုက အရေးပါနေပါတယ်။ ၂၀၁၃ခုနှစ်က ရူပဗေဒ ဆိုင်ရာ နိုဘယ်လ်ဆုကို Higgs Boson သုတေသီတွေက ရရှိခဲ့ပါတယ်။

.
------------------------------
(SpaceShipTwoစမ်းသပ်ပျံသန်းစဉ် ပျက်ကျ)
Virgin Galactic ရဲ့ SpaceShipTwo ၃၁ရက်နေ့က စမ်းသပ်ပျံသန်းစဉ် ပျက်ကျသွားပါတယ်။ ယာဉ်မှုးတစ်ဦးသေဆုံးသွားပြီး တစ်ဦးက ပြင်းပြင်းထန်ထန် ဒါဏ်ရာရသွားပါတယ်။ ဘာကြောင့် ပျက်ကျတယ်ဆိုတာ မသိရှိသေးပါ။ ဒီတစ်ကြိမ်က ၃၅ ကြိမ်မြောက် စမ်းသပ် ပျံသန်းမှု ဖြစ်ပါတယ်။ ပင်မယာဉ်ဖြစ်တဲ့ WhiteKnightTwo က SpaceShipTwoကို အမြင့်ပေ ၄၅,၀၀၀ အထိ သယ်ဆောင်လွှတ်တင်ပေးခဲ့အပြီး SpaceShipTwo ရဲ့ ပင်မဒုံးအင်ဂျင်နဲ့ နှစ်မိနစ် လောက်ပျံသန်းအပြီးမှာ ပေါက်ကွဲသွားတယ်လို့ သိရပါတယ်။ Virgin Galactic အာကာသ ခရီးသွားလုပ်ငန်းမှာ SpaceShipTwo နဲ့ လိုက်ပါစီးနင်းဖို့ စာရင်းပေးထားသူ ၅၀၀ ကျော်ရှိပါတယ်။ ဈေးနှုန်းကတော့ ဒေါ်လာ ၂၅၀,၀၀၀ ဖြစ်ပါတယ်။ ပုံမှန် အစီအစဉ်များအရ ၂၀၁၅ နှစ်လည်ပိုင်းမှာ အာကာသခရီးစဉ်တွေစတင်ဖို့ ရည်မှန်းထားပါတယ်။

-----------------------------
(လက်မှာဝတ်ဆင်ရတဲ့ Microsoft Band)
Misrosoftက ကျန်းမာရေး အခြေအနေကို စဉ်ဆက်မပြတ် ဖေါ်ပြပေးနိုင်တဲ့ Microsoft Bandကို ထုတ်လုပ်လိုက်ပါတယ်။ ၁၉၉ဒေါ်လာနဲ့ ရောင်းချမယ်လို့ ကြေငြာပါတယ်။ Microsoft Band မှာ အာရုံခံကိရိယာ ၁၀မျိုးပါဝင်ပါတယ်။ နှလုံးခုံနှုန်း၊ ခရမ်းလွန်ရောင်ခြည် ထိတွေ့မှု။ စိတ်ဖိစီးမှုကို အရေးပြားမှတိုင်းတာခြင်း ကဲ့သို့ လုပ်ဆောင်မှု များစွာ ပါဝင်ပါတယ်။ တိုင်းထာထားတဲ့ အချက်အလက်တွေကို Misrosoft HealthVault မှာ သုံးသပ်ချက်တွေပြုလုပ်နိုင်ပါတယ်။ ဓါတ်အားတစ်ကြိမ် ဖြည့်ထားရင် ၄၈နာရီ အသုံးပြုနိုင်ပါတယ်။ Windows phone, Android phoneနဲ့ Apple-iPhone စတဲ့ ဖုန်းမျိုးစုံနဲ့ ချိတ်ဆက် အသုံးပြုနိုင်တယ်လို့ ကြေငြာထားပါတယ်။ Microsoft online store မှာ ဝယ်ယူနိုင်ပြီ ဖြစ်ပါတယ်။

-------------------------------

အမေရိကန်လေတပ်ရဲ့ မောင်းသူမဲ့ အာကာသ လွန်းပျံယာဉ် ဆင်းသက်
အမေရိကန်လေတပ်က လွှတ်တင်ထားတဲ့ X-37B မောင်းသူမဲ့ အာကာသ လွန်းပျံယာဉ်လေးဟာ ကမ္ဘာပါတ်လမ်းအနိမ့်ပိုင်းမှာ ၆၇၄ရက် ပျံသန်းခဲ့ပြီးတဲ့နောက် ၁၇ရက်နေ့က ကယ်လီဖိုးနီးယား က Vandenberg လေတပ်စခန်းကို ဆင်းသက်ခဲ့ပါတယ်။ ပြီးခဲ့တဲ့ အပတ်က NASA ရဲ့ လွန်းပျံယာဉ်ကြီးများ ထားရှိစဉ်က သုံးခဲ့တဲ့ Orbiter Processing Facility ၁ နဲ့ ၂ ကို အမေရိကန်လေတပ်က X-37B အတွက် လွှဲပြောင်းရယူခဲ့ပါတယ်။ အရွယ်အစားအားဖြင့် ၂၉ပေ ရှည်တဲ့ ဒီလွန်းပျံယာဉ်ငယ်လေးကို ဘယ်လိုအသုံးချဖို့ ရည်ရွယ်တယ်ဆိုတာကို လှို့ဝှက်ထားဆဲပဲ ဖြစ်ပါတယ်။

---------------------------

(ကမ္ဘာ့သံလိုက်စက်ကွင်းပြောင်းပြန်ဖြစ်မည်)
ကမ္ဘာ့မြေကြီးရဲ့ သံလိုက်စက်ကွင်းဆိုတာ တောင်-မြောက် ဝင်ရိုး အတိုင်း တည်ရှိတယ်လို့ လူတိုင်းသိထားပြီး ဘယ်သံလိုက်ချောင်းကိုမဆို တောင်ဘက်စွန်း မြောက်ဘက်စွန်းဆိုပြီး ခွဲခြားသတ်မှတ်ပါတယ်။ သိပ္ပံပညာရှင်တွေရဲ့ ခန့်မှန်းချက်အရ နှစ် ၁၀၀၀၀ခန့်တိုင်းမှာ ဒီသံလိုက်ဝင်ရိုးဟာ ပြောင်းပြန်ပြောင်း သွားလေ့ရှိပြီး ဒီတစ်ကြိမ် ပြောင်းလဲမှုကတော့ လက်ရှိလူသားတွေရဲ့ သက်တမ်းအတွင်းမှာ တွေ့ကြုံရနိုင်တယ်လို့ ဆိုပါတယ်။ ကမ္ဘာ့မြေကြီးရဲ့ သံလိုက်စက်ကွင်းက နေရောင်ခြည်ကလာတဲ့ အန္တရာယ်ရှိနိုင်တဲ့ အလင်းမှုန် တိုက်ခတ်မှုကိုလည်း ကာကွယ်ပေးထားပါတယ်။ အဲ့ဒီအချက်ကို သိသာစေတာကတော့ ဝင်ရိုးစွန်းဒေသတွေမှာ တွေ့မြင်ရတဲ့ aurora အလင်းတန်းတွေ ဖြစ်ပါတယ်။ ဒီသံလိုက်ဝင်ရိုးဟာ ပြောင်းပြန်ပြောင်းနေတဲ့ကာလမှာ သံလိုက်စွန်း နှစ်ခုထက်ပိုမို ဖြစ်ပေါ်လာနိုင်ပြီး အဲ့လိုကာလမှာ ဝင်ရိုးစွန်းမဟုတ်တဲ့ ဒေသတွေမှာ aurora အလင်းတန်းတွေ တွေ့မြင်ရနိုင်ပါတယ်။ နောက်ဆုံးအကြိမ် သံလိုက်ဝင်ရိုး ပြောင်းလဲမှုဟာ လွန်ခဲ့တဲ့နှစ်ပေါင်း ၇၈၀၀၀၀ ခန့်က ဖြစ်ခဲ့တယ်လို့ ပညာရှင်တွေက ခန့်မှန်းထားပါတယ်။ သံလိုက်ဝင်ရိုး ပြောင်းလဲချိန်မှာ သံလိုက်စက်ကွင်း အားလျော့သွားပါတယ်။ အခုလည်း ESA ဂြိုဟ်တုတွေရဲ့တိုင်းတာမှုအရ ကမ္ဘာ့သံလိုက်စက်ကွင်း သိသိသာသာ အားလျော့လာနေတယ်လို့ သိရပါတယ်။

----------------------------

(မြေပြင်နဲ့မထိတဲ့ စကိတ်ဘုတ်)
၁၉၈၉ ခုနှစ်က ရုပ်ရှင် Back to the Future Part II မှာ မြေပြင်နဲ့မထိတဲ့စကိတ်ဘုတ် (hoverboard)ကို စီးပြတာမျိုး ဟာ အခုတော့ လက်ရှိပြင်ပလောကမှာ တစ်ကယ် ဖြစ်နိုင်ပါပြီ။ hoverboardအတွက် အဓိက တီထွင်လိုက်တာကတော့ သံလိုက်တွန်းကန်အား ထုတ်ပေးနိုင်တဲ့ အင်ဂျင်အချပ်ပြားတွေ ဖြစ်ပါတယ်။ hoverboardတစ်ခုမှာ သံလိုက်တွန်းကန်အား စက်ငယ်လေး လေးခု တပ်ဆင်ထားပါတယ်။ သာမန် ဘီးတပ်စကိတ်တွေလို နေရတကာတော့ စီးလို့ မရပါဘူး။ မြေပြင်ပေါ်မှာ သံပြားခင်းထားမှ စီးနိုင်မှာ ဖြစ်ပါတယ်။ လက်ရှိကာလမှာ ပိုမိုကောင်းမွန်အောင် ကြီုးစားဆဲ ဖြစ်ပြီး ရံပုံငွေ စုစည်းမှုအတွက် Kickstarter ဝဘ်ဆိုက်မှာ ဝယ်ယူအားပေးနိုင်ပါတယ်။ https://www.kickstarter.com/projects/142464853/hendo-hoverboards-worlds-first-real-hoverboard

---------------------------